اولاد عزة

للشاعر الباسل الجوهرى
يا اولاد جعل دقو النحاس والنوبه
صبح القول حقيقة وتانى جاتكم حوبه
ياود الطريفى ابو سبحه لالوبة
يا ابو راى سديد دخلت بلدنا عجوبه
***ا
يا اهلى الشوايقه يالفيكم عقولاُ ماهره
دايرين منكم اوكامبو يمش الاخره
يالماحى النجوس قاصدين بلدنا الطاهره
والتمساح رجع واثارو صبحت ظاهره
***ا
يادار المحس فيكم عرفنا شجاعه
ويا اكامبو ماشفت القبيلة رفاعة
لو الحارة جات للدولة بيبقو مناعة
مابخونو الرفاق ناس الزبير ووداعة
***ا
وفيك يابلدى بطحانى البعدل المايله
لوجاتو الالوف قدامو تصبح حايره
والشكرية فى الحارة الشراره الطايرة
ولو جاك المسلمى خلى ليه الدايرة
****ا
والبرقاوى والهوساوى فيهم ميزه
زايدين فى الصلاح والدين اساس وركيزه
والمسلاتى والكباشى بس كلمة بقولا وجيزه

بهرتو الانجليز والله امه عزيزة
***ا
والهوارى فيه بتلقى ديمة بشاشة
هبانية فيهم نخوه ديل اهل المكارم وناسا
والفلاتى حافظ دينو فعل الخير بكوسو كواسا
والداجاوى لوحه جميلة با واكامبو كيف تتناسا
***ا
والحلفاوى ثم الدنقلاوى حضاره
ومن زمن بعيد فى الحكمة لينا منارة
بنى هلبه وبنى جرار ياهم ديل رجال الحاره
بديرية وبنى عامر فى المهديه كانو بشاره
***ا
وبلدى بتلقى فيها ركابى معروف اصلو شرف وشهامة
وفيها زغاوه ناس فزعة وكمان التامه
فيها تعايشى وفيها مسيرى ديل فى بلدى زى الشامه
وفيها نوير وفيها النوبة ديل خاتين كلام وملامة
=======
واولاد كاهل معروفين سلالة اصيلة
وكم فى الحق بدافعو وياما شالو الشيلة
ابونا البرعى يا قايد الرجال ودليلة
نارك ما بتموت ويطفوها زى ناس ديلا
*****
والجموعى لو شفتو بتعرفو براكا
لو جارت عليك الدنيا ببقى حداكا
ويالحمرى اللزوم بس قادر السواكا
ما بتخشى النزال ودايما بتحمى حماكا
يالمنصورى معروف جدك النعمان
*******
كان للضيف بيفرش دارو حب وحنان
واخوى عثمان معروف حبو للسودان
ومن قبلك يوسف كبر قمراوي تب مالان
*******
والفوراوى شفنا عليه ديمة سماحة
لو الحارة جات تلقاهو مسك الساحة
ود راشد اصيل فى البادية كرم وفصاحة
******
واسدا فى عرينو وعند اللزوم كتاحة
وفيها الرث هناك شلكاوى عالى جبينو
حافظ للعروض وفى الدبكة بحرس طينو
وفيها بتلقى دار حامد محزم وديمة عالى جبينو
واخوى ادروب هو نمرا ديمة فاتح عينو
****
بلدى اصيلة فيها جوامعة وفيها الفونج
فيها شهامة من ناس تلسى لكركوج
فيها مسيرى فيها الدينكاء عرب وزنوج
ديل ياعزة مابتراخو شامخين زى جبل تاجوج
****ا
وكيفن العلوج هم بجهلو الزي ديل
مشهود لخصالم وفي الحاره فرسان خيل
ولسة بلدي فيها المافب ليهو مثيل
وياالقاصد رئيسنا بتلقى سهر الليل
[center]