ضلعي الشمال

موضوع: ضلعي الشمال الثلاثاء نوفمبر 03, 2009 6:41 am

الفاتنه يا ضلعي الشمال ..
يالفي العيون مترسبه
يا مويه في وهج الهجير ..
أدوها زولا اشلطالبا
قالوا في الريد المحن
بعد النسائم أتربه
وتاني تهدأ العاصفه
وتصاحب العين حاجبا
والخشو دنيا الحب كتار
لقوها باقه كهاربا
لا واصلوالمشوار عديل..
لا الريده قالوا نحاربا
وقالرا موج الشوق عميق..
ومويتو يظمي الشاربا
وسفينة العشاق أمل..
الريح بقوه تلاعبا
كل ما تشرق شبر..
الدفه راجعه مغربه
الريده في جوه البشر..
المولي للناس واهبا
الا الفرق والاختلاف ..
الناس كتيره مذاهبا
لمن تكون الامنيات ..
بعيده قاسيه مطالبا
تلقاها من جمر الصبر..
أرواحنا سالت ذائبه
كل المسائل والامور..
بايدنا نحن نصعبا
ونرجع نفتش للحلول..
والقسمه تنتج سالبه
مين بيجبر للكسور؟..
لو خانه واحده يقربا
يا حب تعال أقعد معاي..
أجمع سنيني وأضربا
تلقاك سارق كل حياتي..
لو كنت يا حب حاسبا
مين الهداك يا حب علينا؟..
عشان نفوسنا تعذبا
وأداك جحيم الشوق عشان..
تحرق قلوبنا وتلهبا
يا حب أكان هدفك أكيد..
بينا المسافه تقربا
أهلا تعال أدخل قلوب..
بيك هاشه مرحبه
ما كتار الجربوك..
حصدوا النهايه الكاذبه
نصحونا ما سمعنا الكلام..
والريده قلنا نجربا
يا حب كفاي الجبتو لي ..
دموعي انت مسببا
وأوجاعي من صد الحبيب..
مصر علي تقلبا
الريده سلطان القلوب ..
في الناس تسوي العاجبا
والريد أكيد ما كلمه هينه..
بسهوله ممكن نعربا
الريده عشره وانسجام..
وذكري حلوه وطيبه
وما بتكون خوه وصداقه..
ما الريده عاليه مراتبا
لو صمنا ثانيه من الغرام ..
قلوبنا نحن نعاتبا
أو غب طيفك لحظه بس ..
نلقي الدموع متسربه
لو مر يوم يا فاتنه يوم ..
والوحشه لي مصاحبه
أتوسد الصير المرير ..
والغمده للعين تغلبا
يا فاتنه زولك في الهيام..
الريده صمم قالبا
وأصلو ما اتعود كمان..
أوراقو يرجع ساحبا
وبرضو مؤمن بالنصيب..
والفرقه الله يكضبا..
الله الله يكضبا

شرفت الحلاويين بتاريخ 2004م